كني بديت الليل فيني عن هوى بالي عزوف لكن بعد ما غرد القمري؛ سعف روحي دلى

ما ضيقت صدري وأنا سالي مشاريه الهنوف اللي لو إن قلبي سلى وارتاح عنها ماسلى

تقول؛ لامن شفت دمعي صد، مادامك عروف وأقول؛ لامنك نثرتي مدمعك زدتي حلى

هاتي العتب وارمي سهام اللوم و استلي سيوف لا تذخرين من المعاتب شيء دامه من غلى

ما عندي إلا حبك أحرم له، وألبي له، وأطوف وأشهد على نفسي بتقصيري، وأقدم له ولاء

ما تاخذك مني الظروف، أنا هنا لجل الظروف للحين ماني ناسي أول يوم قلتي لي (هلا)

قبلك (تراحيب المطر) نسمع بها ولا نشوف إلا (تراحيبك) نبت منها الشواطي والفلا

الخوف خوف الفقد وإلا غير فقدك ماش خوف لاعاد يفضى قلبي من الحب من عقب امتلأ

اللي رشف من كفك المعسول: يرويه الرشوف وش عاد من مثلي شرب من كفك العذب وكلا!!

لا من تثنى عودك قبالي وعيا لا يروف من كثر ما قلبي يدق.. تقول صايبني بلا